Abakuru b’imidugudu bishimira ko bahawe inyoroshya ngendo.

 

Abayobozi b’imidugu 132 bishimirako bahawe amagare azabafasha gukomeza ibikorwa byo  kubungabunga umutekano  no gukomeza ubukangurambaga bugamije gukumira  ihohoterwa rikorerwa abangavu

Ibi babitangaje  ubwo bashyikirizwa ga aya magare n’Umuyobozi w’Akarere ka Nyaruguru ku bufatanye na Plan International, Umufatanyabikorwa w’Akarere ka Nyaruguru mu  guteza imbere uburenganzira bw’umwana no kurwanya ihohoterwa rikorerwa abangavu.

Vestine Nyirakanani uyobora umudugudu w’Amakumba, Akagari ka Nkanda, Umurenge wa Busanze, wahawe igare yagize ati” iri gare  rizamfasha kujya kureba uko umudugudu wiriwe n’uko waraye. Iri gare nigiye kunyongerere imbaraga.  rizamfasha gukora ubukangurambaga mu bangavu mbasaba  kwirinda kutiyandarika. gushaka amakuru  ku buryo bworoshye no kuyatanga byihuse, guhera uyu munsi ngiye kongezamo intege nongere kugira ubushake n’ubushobozi bwo gukunda igihugu.”

Yakomeje agira ati “Mu kuzunguruka umudugudu, nzenguruka mu marondo ya ku manywa n’aya nijoro, mbonye amaguru abiri yunganira abiri nari mfite.  twari dufite amaguru abiri none baratwongereye  ubu abaye ane. Igare  risamfasha  gushaka  amakuru  ku buryo bworoshye no kuyatanga byihuse, guhera uyu munsi ngiye kongezamo intege nongere kugira ubushake n’ubushobozi bwo gukunda igihugu.Ndashyimira Nyakubahwa Perezida wa Repubulika wabonye imvune tugira tujya ku marondo ya ku manywa na nijoro akaba atwongereye imabraga”

Umuyobozi w’Akarere ka Nyaruguru, François Habitegeko, yabwiye abayobozi b’imidugudu ko bahawe amagare mu mpera z’umwaka nk’impano y’umwaka wa 2021, no mu rwego rwo kugira ngo bagaragarizwe ko ubuyobozi bukuru bw’gihugu buzi akazi bakora.

Yanababwiye ko n’ubwo bayahawe mu mpera za manda y’imyaka itanu bari baratorewe, bitababuza kuzakomeza gukoresha ayo magare nk’abaturage basanzwe, uretse ko no kongera kwiyamamaza batabibujijwe.

Yagize ati “Aya magare ni ikimenyetso kibahamiriza ko n’ubwo mushoje manda, mudashoje gukorera igihugu. Kandi mushatse no gukomeza gukorera igihugu nk’abakuru b’imidugudu, nta miziro ibariho. Wakongera ukiyamamaza, abaturage bakugiriye icyizere bakikugirira na none ugakuba karindwi kuko noneho ufite n’ubushobozi.”

Yunzemo ati “Ariko n’utazagaruka mu buyobozi, afite inshingano nk’undi muturage mwiza yo gufatanya n’abandi, kugira ngo ari uwo mutekano tuwubungabunge, ari izo gahunda za Leta tuzitabire. Ntabwo uwabaye umuyobozi ajya areka kuba umuyobozi.”

Abakuru b’Imidugudu bahawe amagare ni 132, baje biyongera kuri bagenzi babo 93 bayobora imidugudu ikora ku ishyamba rya Nyungwe na bo baherutse guhabwa amagare.